New LOOK

صبحكم الله بالخير

ولهت عليكم :)
ومن طول الغيبات ياب الغنايم.. عاد لاتستانسون وايد الغنايم على قدي

وايد طافني !! حسافة
يالله ألحق أحوس عندكم وأتطمش

جاي الضحى اليوم من عنده ؟

بسوي نيو لوك عشان تنفتح شهيتي حق البلوق
اقتراحاتكم ؟

ذبانه في 2011

أول شي
Happy New Year
مني لي كل سنة جدام..
وكل عيد وطني وانتو بخير
وعيدكم الفطر والاضحى مبارك
وأي مناسبه أعرفها وماعرفها أهنيكم عليها
وسلامتكم.. وبس :)
وبدش بالموضوع..
شنو يعني لما تداحرني ذبانه ! وياكرها اذا صارت لزقة وماتفج
ولاتحوس عند ويهي وأنا أكل !
شسوي يعني يا أخت ذبانه أهد أكلي وأجابلج ولا تبيني أوكلج مثلا !
الحدث اللي صار..
توني راكبة الموتر على قولتهم من بعد تعش ساعة اجتماع في أحد المناطق شبه الصحراويه..
ولأن الجو حلو فتحت الدريشه مدة أقل من عشر الثانيه وياليتني ما فتحتها ..
هجووووووم.. وتشرف الأخت ذبانه بدون عزيمة.. أكشها مني مناك ماكو فايدة..
ويه بمشي وكيفها..
وأنا عالخط السريع.. ! يا طابه على ايدي يا على ويهي ياتحوس يم الدريشة .. ززززززز.. وتوزوز باذوني... واااااي ..
ومن تقرب يم الدريشه فجيتها أقول يمكن تحس على دمها وتذلف..
بس وين أبت المصونة ذبانه عن الطلعة وقررت ماتفج اليوم...
يوم قربت حدود أرض الصمود.. وقفت عند الاشارة.. ويا أنا يا الذبانه..
وكاني متفرغة لج الحين..
وكش مني وكش مناك .. ولزقة بالدرايش واحكرها بربعة.. وطاخ وكش وهش..
وي ما بقت تذلف.. ذبحتني وطلعتني من طوري حسبي الله عليها !!

وصلت البيت وتوني بفج الباب بنزل.. ولا ماسمع الا .. زززززززز.. شنو هذي ؟! هم ذبانه !!
ولا ياجماعة الخير طلعت المعركة مع ذبانتين مو وحدة ؟!
عاد عقبها قمت أفكر.. أنا تسببت حق هالذبانه الفقيره ويبتها لي هني شتغبر بعمرها..
هذي لو طايره بروحها حدها حدها توصل الشاليهات.. ؟
تهقون ذبانة المناطق شبه الصحراويه يوم وصلت أرض الصمود بتعيش ولا بطفشونها الربع ويموتونها قهر

حيامة

بداية وردا على سالفة غيابي عن الكتابة
كنت ولمدة 6 اسابيع تقريبا أحاول أدش بلوقي ماني قادرة
وكالعادة ألوم ذاكرتي على نسيان الباسوورد
بس طلعت المشكلة موذاكرتي .. ألف الحمدالله الشكر لله طلعت سليمة
الله ياوناستي يوم دخلت البلوق أخيرا والعلة ولله الحمد مو فيني طلعت في السيستم

المهم
الحين نرد على موضوعنا




أمس كان عندي موعد حجامة.. وكالعادة لازم أدخل ضحية معاي في الموضوع
وكانت الوالدة الله يحفظها ويطول بعمرها

يعني مادري اشطرى على بالي بس حنة بعض الداعيات الملتزمات مؤخرا في العايلة
وانا الله يسلمكم من يقولونلي شي ديني وصحي سيدة وراهم وراهم

وبدت الدكتورة تشتغل.. أبيه جني بهون
دكتوره.. جنه جبدي تلوع
دكتوووورة.. أخاف

ايه بتخافي ده انتي ذيب !؟
يعني بس اسم .. بس وقت الصجية فار

المهم.. وابتدت فيني
كل أيات القرأن اللي حافظتهم والله مو حافظتهم قريتهم
و تقريبا 35 دقيقة من التشخيط والدمامين تسيل

يعني أنا سادية واتسبب بالعوار حق نفسي ولاشنو
وتذكرت كلام السستر وقت الولادة
مدام يو لايك بين ( تحبين الألم), ياشقول
اكو أحد يحب الألم؟

ويوم شفت أثار الحجامة بقى يغمى علي
ونفسيتس ليما الحين تعبانة
حتى زوال الاثار

ويتبع حتى موعد الحجامة القادم بعد شهر

Q8 or DUBAi

قبل أيام قليلة من اجازة العيد السعيد ( حلوة النحويات ها ) وبدون أي مقدمات
أبي أسافرررر ! شنو وين بتروحين .. مادري أي مكان بهج وبس
دبي اييي دبي هذي رقي بتروح ويا ريلها وعيالها وأم ناصر كاشته بنصور وأبوه وهاجة دبي مع خواتها
يانروح فاميلي ولا بروح سنقل
يامعودة شودينا لوية وحزة الحزة ماكو حجز
مالي شغل اذا ماكو حجز أروح ترانزيت 5 محطات
بس بسافرررررر
اذا منت رايح ، أنا برووووووح
وانا شسوي هني بروحي كل الربع مسافرين
والله عاد مادري أنا بسافر واللي بيي حياه الله

وشدينا الرحال على دبي
يا حلاتها من ديرة
راحة واستحمار .. عفون اقصد استجمام
من سبا لي سبا ومن مسبح لي بحر
ومن دونت لي بنانا
ومن قهوة لي مطعم
مراهقة علـ أخررر
أكو أحلى من هيك

وراحت السكرة ويت الفكرة
رجعت بـ 2 كيلو زيادة
وطلبات مدارس
ودوام من 7 الصبح
وأهلن أهلن بالروتين

بس راجعة يادبي
soooo Soon

Happy Birthday to miss B !!!

الغالية بزاني
كل عام وانتي بخير
ماني متخيلة
8 سنوات مرت بسرعة البرق
واشوفج تكبرين جدامي
الله يحفظج ويخليج

وانا اقول اشفيها ضروسج كل يوم والثاني طايج واحد !! ويلا تحت المخدة وهات يا 10 دنانير
يبيلنا نطالب ابـ بدل طيحة ضروس

ولا كليرز الله يحفظها ويخليها شفط من المعاش دايركت
وفانتاسي هم ما عليه قصور ضربة قاضيه
يعني اشفيه ش خالد بن الوليد ها

وبودي شوب ما ادراك مابودي شوب

ااااااه يا بزاني تبين جاقواررر !!! ابييييه
هذي اللي مايت على البال والخاطر اشوة قلتي من الحين

بس هم اقوووول
يا حلات البناااااات

ويني فيه ؟

صار لي ساعة احاول ادش البلوق بس ماني قادرة اتذكر الايميل ولا الباسوورد !!
انا زين مانسيت اسمي ! اعتقد لوما ينادوني فيه ولا جان ما ذكرته !
رديت !! ماني مصدقة ! انا صج رديت ولا انا احلم !!
احس اني رديت ظاهريا.. من الباطن أنا في عالم ثاني !
الناس غير ياربي مادري.. أشكالهم ، ألوانهم، تصرفاتهم، كلامهم !
مادري أهم غير ولا أنا ماني قادرة أندمج وياهم !
بصراحة ، أنا بصراع العودة للحياة ! أحاول بكل قوة اني أرجع.. ماني قادرة !
انا ليما الحين مارجعت.. وضعت بنص الطريج مادري ويني فيه !

زارا الكارجي

زارا الكارجي.. زارا الكارجي
هو سمعووو هالانجليزي.. ينادي زهرة الخرجي
وينها وينها..
ماكو أحد.. يمكن أنا يتراوالي اسم زهرة الخرجي
5 دقايق بعدها.. ولا زهرة الخرجي
الوالدة باعلى حسها : زهرة زهرة
يمة الله يهداج لاتنادينها..
الوالدة : لا بناديها, زهرة
وتأتي زهرة الخرجي .. نعم منو ؟ من حضرتج ؟
الوالدة : احنا معجبينج ..
بيني وبين نفسي.. معجبينج منين ! ماعمري سمعت طاريها عند الماما ,, بس يللا
زهرة : يا هلا ومرحبا فيكم مشكورين
الوالدة : ها زهرة اشعندج هني ليما ألحين تعالجين ؟
واي يمة.. شكو فيها !!
زهرة ترد : لا والله الحمدالله خلصت وياية مراجعة وباخذ تقاريري
الوالدة : الحمدالله على سلامتج وماتشوفين شر ..
وتروح زهرة وألحقها أنا..
ها زهرة سلامات وماتشوفين شر,, منو دكتورج، وشلون علاجج، واشكثر طولتي، عسى ماتعبتي، اشعطوج، واشقالولج.. !!!!
مو جني ملقتها.. بس شسوي لازم أعرف تجربتها..
المسكينة.. جاوبتني على كل شي ماردتني بشي ..
عسى الله يشافيها ويديم عليها الصحة والعافية..
صج اكسرت خاطري

أخيرن.. زهرة ممكن صورة